Fiasta gronda a Sagogn – La Colurada vol. 5 ha uonn giu liug sonda, ils 05-11-2022. Sco mintg’onn fuorma La Colurada per nus sco uniun il punct culminont da nies program digl onn.
Sco gia igl onn vargau ha ina entira fulanada anflau la via a Sagogn. Che nossa fiasta gauda in bien num havein era uonn puspei astgau constatar. Cun grond plascher havein nus numnadamein puspei astgau dumbrar rodund 700 giuvens e giuvnas ch’ein vegni dall’entira vallada per far fiasta culs da Sagogn. Daco ei La Colurada, era sche fagein gia la 5avla ga la medema ediziun, tuttina schi beinvegnida tier la giuventetgna dalla Surselva? In dils nummerus pensums digl OK ei da mintg’onn crear ina pintga innovaziun. Aschia havein, sco gia igl onn vargau, illuminau la casa da scola cun differentas projecziuns da colurs. Niev han ils hosps uonn giu la pusseivladad da projectar ina fotografia sil beamer sur la bar en halla da gimnasitica. Tgei che croda segir en egl a mintga visitader ed a mintga visitadra ei nossa decoraziun extraordinaria en halla da gimansitca sco era el «buncher». Apropos halla da gimnastica e «buncher». Nus havein era uonn purschiu dus «dance floors». Aschia ha nies DJ el «buncher», che ha spontan remplazzau in auter ch’era malsauns (grazia fetg Nando!), mess si musica en direcziun da «house e techno». Entras in niev sponsoring cun «El Tony Mate» havein saviu porscher il schi numnau “Turbo Tony», il niev hit denter las bubrondas dad alcohol. En halla da gimnastica han ils giuvenils saviu saltar tier musica da «dance hall». Fiasta ei uonn vegniu fatg empau pli ditg ch’igl onn vargau. Ils davos hosps han saltau tochen las 4:30. Silsuenter ha ei giu num «far uorden e schubergiar il da grob».
Baghegiau si il venderdis e sonda e silsuenter fatg uorden la dumengia havein uonn aschi effizient sco aunc mai. Grazia fetg als rodund 40 commembers e commembras dall’UGS, sco era ad ina persuna externa, per lur buna lavur! Ina fiasta da tala grondezia drova ina buna organisaziun e fuss senza in OK buca pusseivla da realisar. Aschia vala il pli grond engraziament agl OK per lur grond engaschi e per lur nummerusas uras unfridas sper emprendisadi, scola, lavur e studi. Grazia fetg a Samuel Maissen, Alessandro Maissen, Nadja Eichenberger, Andri Carigiet, Eric Derungs, Anna Cavelti e Sina Cavelti. Era menziunar lein nus nos sponsurs: El Tony Mate, Oswald Getränke AG, Casutt AG, Peak-Tec Veranstaltungstechnik GmbH, Montalta Transport + Kies AG e Palancaus Surselva AG. Entras Vies sustegn havein nus, era en quei onn da crisa economa mundiala, saviu porscher ina sortida cun prezis fairs alla giuventetgna dalla Surselva.
Bi che vus haveis era uonn fatg fiasta cun nus – see you next year party people!
