La secunda fin d’jamna dil november ei l’uniun da giuventetgna Sagogn puspei suenter in pèr onns pausa separticipada cun in’equipa all’turnier da curlar vi Flem. L’emprema gada ei la giuventetgna gia separticipada els onns 2014 e 2015 a quei turnier per in’e scadin (“Alles macht mit”). Mintga equipa ha per ordinari ina denton silpli duas persunas che san curlar.
Avon dus onns, il november 2020 era in’equipa sesanflada, mo il turnier ha suenter il trenament stuiu vegnir annullaus. Collissiuns da termin cun nossa fiasta han impediu ina participaziun igl onn vargau. Uonn eisi denton gartegiau. Malgrad che nus havein munchentau il trenament il vendergis perquei che nus havein giu da baghegiar si lezza sera per la Colurada era la prestaziun dall’equipa propi buna. Ils biars da nus eran per l’emprema gada sil glatsch:
Jan Weber (First)
Andri Carigiet (Second)
Uolf Candrian (Skip)
Flavia Sac (Second)
Anian Camathias (Tierz)
Bunas prestaziuns? Entschiet ha il turnier vendergis sera cun in giug encunter “d’Alparosa” sut la bitgetta da Sabine Leiner costumadas sco Pocahontas. In bi maletg cun nossas cassaccas cotschnas! Mo strusch in crap ei restaus en casa, ni da nus ni dad ellas. Senza craps san ins era buca scriver bia puncts. Mitch, skip che deva sil rink 5 sper nus, ha clamau vi siper mei sche “plaun” vegli buca gir “langsam” per romontsch e commentau il proxim crap cun “ohne Halt bis Ziegelbrücke!”. Sulet in end havein nus saviu gudignar en quei emprem giug e scret in soli sulet punct. Mo priu cun havein nus quell’emprema experientscha sil glatsch e malgrad ina cuorta notg suenter star ella Sports Bar da cumpignia. Usit dil curlar ei ch’il victur paga ina runda suenter il giug. Avantatg da dar ella davosa gruppa dil gi ei ch’ins ha ina meisa per star.
L’autra damaun havein nus giu da cumbater il mal il tgau e l’equipa da Gian Jörimann e Till Wiestner da Trin che ha spiars il gi avon sin rink 5 cun in semegliont resultat sco nus. Quei secund giug encunter in adversari pli ferm havein nus denton pront gudignau. Il rang 16 dil turnier da “na Bittschön” muossa ch’il cletg era forsa era empau da nossa vart en quei giug.
Sonda sentermiezgi essan nus enstagl guder igl apéro ora el sulegl da november stai sil glatsch encunter “ohne Zweifel”. Senza dubi in bien team entuorn Luca Fontana da Flem. Siu tat tschintschavi aunc romontsch ed haveva adina plascher sche enzatgi discureva romontsch a casa. Era els han giu plascher d’udir ils cammonds per romontsch sil glatsch. Sil glatsch eran las prestaziuns dallas equipas ualti ulivadas. Nus havein spiars 6:7 e stuiu miserar duas gadas tgeinin crap che seigi pli datier. Inagada a favur da nus, inagada encunter. Mo omisduas squadras han gudignau treis da sis ends.
Dumengia avonmiezgi havein nus giugau allas 10:15 encunter quater curladers che dumognan quei sport. Prest mintga crap setschentava en casa. Suenter treis ends era il resultat 0:8 a favur dils chaufeurs da posta “Staihockers”. Il spért dil curlar gi ch’ins lai scriver igl adversari silmeins in crap. Mo nus havein cul davos crap dil quart end anflau la lucca e tarmess il davos crap, il marti, atras quella ch’el ha tuc il crap che schischeva shot, scadenau quel ord la casa senza sez semuentar ord la casa. Resultat; tschun cotschens en hetta! Ord il nuot, 8:5 il niev resultat e la giuventetgna da Sagogn puspei el turnier! Mo il davos crap ha skip Markus Bachmann plazzau exact nua ch’el sudeva e nus havein spiars 10:6, denton cun scriver ina hetta da tschun. Setschentai essan nus la fin finala sin rang 28 suenter giugar treis bunas partidas.
Gudignau il turnier da curlar ha la giuventetgna da Flem “The Brain” cul skip Tumasch Ragettli. Cordiala gratulaziun als Brainers! Da nos adversaris ha negin dumignau ei el final dumengia suentermiezgi. Mo il plascher pil giug da curlar ei s’envidaus ed in pèr commembers ein sedecidi dad ir a terenar gievgia sera. Interessents astgan bugen s’annunziar. Nus mein ensemen cun in pèr da Sagogn che curleschan gia in temps vi Flem Uaul, en ina dallas pli bialas hallas da curlar ell’entira Svizra. Gudignau il premi pil meglier costum havein nus probabel mo buca perquei che quels da Flem ein semudergiai cun scriver correct “giuventetgna” sin quei cedel. Gudignau ha la squadra “Ils Saleps” da Bea Spadin, tuttas sevestgidas sco Queens Elisabeth en bellezia vestgius.
Vinavon a tuts “bun crap!”. In cordial engraziament a tuttas squadras, a Tony, Monique, Rolli ed igl ulteriur team davos la bar sco era en special a Sarina ed Adriano per la cummissiun da giug per la buna organisaziun! Tgi accumpogna nus en in onn?
