Ils 4 da mars 2023 ha giu liug il di da skis dalla giuventetgna. Ils davos onns ei l’attractivitad da quei event per cletg puspei carschius. Entgins pon forsa aunc seregurdar vid il di da skis egl onn 2017 nua che mo duas persunas han separticipau. Anzi uonn dumbravan nus 21 commembras e commemembers, daquei eran entuorn 25% dalla famiglia Cavelti.
La truppa ei serimnada si Murschetsch las 9:15. Il tschiel era cuvretgs, ei fageva grisch, mo perquei era la motivaziun tuttina buna. Nus havein piru las cabinas pintgas tochen Curnius e vinavon la sutgera sil Crap Sogn Gion. Arrivai sil cuolm, percletg sulegl, giu ella val ina termenta cozza da neblas. L’ura muossava gia las 10:00 – plaunet temps per l’emprema pista. Il “capo di da skis” ha presentau l’emprema etappa dalla ruta cun la finamira dad esser entuorn las 11:00 silla Siala. Aschia essan nus fillai giul Plaun, sil territori da Sagogn nua che nus sesentin da casa. Vinavon ha la ruta manau nus sur Nagens e Muotta Rodundna silla Siala. Tenor decisiun da majoritad essan nus schulai via Grauberg giu tier la hetta dil Segnas per far la pausa da miezdi. Da bellezia aura e survesta havein nus gudiu ina buna tschavera cun in pèr gervosas – ins ei bunamein intec vegnius marschs.
Suenter marenda havein priu la pista giu Stargels. Beinspert han entgins vuliu saver tgi che seigi propi la pli sperta skiunza ni il pli spert skiunz dalla uniun. Aschia ei la cuorsa tochen giu la staziun da Flem stada lantschada – mo con recli che quella era, lez statt ellas steilas. La finfinala ha Silvio Caprez vargau Lill Cavelti cuort avon la fininziun. Naven da Flem havein nus lu priu las pendicularas anavos sin il bi Plaun da Sagogn e silsuenter vinavon cun la sutgera sil Crap Sogn Gion. In cuort sguard sin l’ura muossa gia las 14:00. Il team aprés-ski va en direcziun Tegia Miez per reservar in pèr meisas cun biala survesta. Ils sportivs han priu la caschun dad aunc far in pèr meters d’altezia damai che l’aura era aschi fenomenala.
Tgei fuss il di da skis senza igl aprés-ski? Suenter entgins café lutz ed auter uorden eran las 17:00 aunc adina 12 commembras e commembers ella Tegia Miez, daquei aber mo pli 1 Cavelti – gie ils fleivels prendi eba pli baul. Plaunet essan lu semess sin via encunter Tegia Larnags cun in pign stopp ella Bar a Curnius. In dus rötlis pli tard essan finalmein arrivai ella Tegia Larnaags – gie bunamein senza incaps. Las plattas carn e caschiel ein gia stadas semtgadas – quei ir cun skis far fom. L’energia era pupsei emplendia, aschia era ei clar ed nunevitabel che nus essan la finfinala setschentai ella Indy Bar a Murschetsch. Entuorn las 22:00 era il di da skis lu officialmein a fin. Entgins han denton aunc dau las davosas en nies niev “Rümli”, auters han giu il desideri dad ir el Riders. Tut a tut era quei pupei in genial di da skis, aschia che certinas historias vegnan guess aunc star ditg en memoria.
